الانسان ليس له عقلان ولكن هو عقل واحد يقوم بوظيفتين مختلفتين وللتميز بين هاتين الوظيفتين تم تسميتهم بأسمين هما العقل الواعى والعقل الباطن او اللاواعى.

العقل الباطن  (اللاواعى) :هو المسئول عن المشاعر والعواطف والاحلام وعن مزاج الانسان وهو الذى يتحكم فى  تصرفات وسلوكيات الانسان ويقوم بتخزين ما يمر به الانسان على مدار حياتة سواء بالسلب او الايجاب .

العقل الواعى :يعى ما يحدث فى نفس الوقت على سبيل المثال لو كنت تشاهد التليفزيون فان وعيك يتعامل مع ما يرأه الان .

ولكن ان سرحت بخيالك فهذا يعتبر اللاوعى . 

من منا لا يدور بداخلة حوار ما بين عقله الباطن و عقله الواعى بل قد يصل هذا الحوار الى حد الصراع  ,لاما غالب او مغلوب

حوار بين العقل الباطن والعقل الواعى:

العقل الواعى :عاوز النهاردة اعمل حاجات كتيرة . 

العقل الباطن:عاوز تعمل ايه ؟

العقل الواعى :عاوز اعمل رياضة و اتصل باصحابى اسأل عليهم و اعمل صنف حلو يعجب اسرتى ,…و…. 

العقل الباطن:ياه كل ده هاتعمله؟

العقل الواعى : اه  ايه المشكلة يعنى ؟

العقل الباطن:كل ده كتير قوى ومحتاج مجهود وشغل وتعب. 

العقل الواعى : ولا تعب ولا حاجة  برضة فين المشكلة ؟ اليوم طويل وانا انسان جوايا طاقة .

العقل الباطن :ياعم ريح نفسك بقى و خليك مبلط و نايم على سريرك ,الدنيا زهق وملل وسيبك من اصحابك اللى ممكن تكون مش على بالهم اصلا , ومن الرياضة اللى فيها تعب و مجهود و لا تعمل اى صنف حلو لانه ممكن مايعجبش حد .

العقل الواعى :تصدق انا فعلا قرفت منك ومن عيشتك .

العقل الباطن: ايه؟ بتقول ايه؟ قرفت منى ومن عيشتى ؟ هو انا عملتلك حاجة ولا جيت جنبك اصلا ؟

العقل الواعى :  انت اصلا مافيش حاجة ماعملتهاش .

العقل الباطن : ياه ده انت شايل ومعبئ منى قوى كدة؟

العقل الواعى : تعاللى بقى ….ده انت سبب غلبى و سبب كل طاقة سلبية جوايا و سبب كل ما هو سئ .كل ماانوى اعمل حاجة تمنعنى انت ,انا ببقى صاحى جوايا حاجات كتيرة نفسى اعملها واغير بيها مودى واجدد نشاطى ودنيتى ولكن انت اللى بتمنعى و تكسلنى فى كل مره انوى اعمل فيها حاجة .  ولا كأنك عملت حاجة .برغم ان انت سبب كل حاجة سيئة .دايما جوايا صراع مابين اللى عاوز اعملة وما بين الواقع العملى او بمعنى اصح التنفيذ.

العقلى الباطن : طب خلاص ماتعملش عقلك بعقلى , محدش قالك تمشى ورايا فى كل حاجة .

العقل الواعى : المفروض اننا عقل واحد وليس عقلين بس انت انفصلت عنى ودايما ماشى عكسى فى اى اتجاه ,مش عاوز تمشى معايا دايما معاكسنى فى كل امور حياتى

العقل الباطن : على فكرة انت المسئول عن كدة مش انا .

العقل الواعى : ازاى يعنى ممكن توضحلى .

العقل الباطن : ماهو يا حبيبى لازم تعرف انا صندوقك الاسود , لو انت مخزن فية حاجات كويسة ,الدنيا هاتبقى لذيذه معاك ,لكن لو انت طول الوقت عمال تخزن كل الماضى الاليم بتاعك وفشلك الى مريت فيه فى يوم من الايام و اللى خانك واللى تعبك واللى هجرك واللى ………واللى …. وهلم جر .. .خلاص صندوقك الاسود ده قرب ينفجر من كتر ما خزن اللى جواه . انت عمال تعبيه .

العقل الواعى : طب اعمل ايه يعنى ؟ اودى كراكيبى فين ؟

العقل الباطن : برافو عليك ,اديك قولت كراكيبى ,انت عبرت صح , زى اى ست بيت ناجحة كده لاما تيجى تحب توضب بيتها وتخليه جميل بترمى كل كراكيبها اللى متخزنه بقالها عشرات السنين , تعالى كده اسالها احساسك ايه بعد ما رميتى كراكيبك ؟ اكيد هاتبقى سعيدة جدا .حاول بقى ارمى كراكيبك ديه ووضب صندوقك الاسود باستمرار علشان ما بقاش حاسس بتقل ,وبالرغم من رغبتك المستمرة فى النشاط والحيوية بتلاقى نفسك مش قادر تعمل حاجة وده بسبب انى انا حاسس بتقل شديد ومش قادر اجاريك فى احساسك الايجابى .

العقل الواعى :برضه ما زال السؤال قائم , اعمل ايه برضة ؟

العقل الباطن : هو انا اللى هاقولك على كل حاجة ؟ ليه دايما كدة مغلوب على امرك ؟ انا قولتلك على الداء وانت المفروض عليك الدواء , ولكن بالرغم من كدة هاساعدك برضة ,بص يا صديقى ,احنا دلوقتى عرفنا المشكلة وحطينا ايدينا عليها عليك انت بقى الباقى وزى ما قولتلك من شوية اتخلص من كراكيبك .بلاش تخزن القديم ,طلعه باستمرار ,ازاى بقى ؟ ده دورك انت اللى تحدده ازاى ,تفضى صندوقك الاسود وتحافظ علية متوضب و مترتب باستمرار 

سواء بقى تستعين بصديق يساعدك , تستعين بنفسك لوعرفت او تستعين بمتخصص لو كانت كراكيبك دية كتيرة و استعصت عليك . 

كده اعتقد الرؤيه وضحت ليك و عليك  انت الدور بقى اننا نبقى اصدقاء وحبايب ومبقاش عائق ليك فى امور حياتك .